1Cor 12 | NAS | STEP | Enang diiꞌ mmaikoriꞌ, ninge diiꞌ noruꞌkoo pia-antarampimang teing kapooꞌnanka Tanuaang-etaning avuavuꞌ.

1 Corinthians 12

Avuavuꞌnanka Tanuaang Meekung-etaning Avutevuꞌari otoinaꞌ

1 Enang diiꞌ mmaikoriꞌ, ninge diiꞌ noruꞌkoo pia-antarampimang teing kapooꞌnanka Tanuaang-etaning avuavuꞌ. 2 Diiꞌke noruꞌeri otong tenang diiꞌ mutaanang-koo otorikoꞌnang Kumponing tositosinanka siompereri poorarima noruꞌ masikung nkaveriarukoꞌ. 3 Nka tee diiꞌ enang sirapoꞌaaperaririoꞌ naurampimang Kumponing bakaning nantoong masikeng tasiꞌpereriainaꞌ. Niiꞌnung naninge Jiisuuꞌ barakosiꞌkoo tampuko noruꞌeriaing tee naning Kumponing bakaang Tanuaang-eta karoaung. Eeꞌnoko naninge Jiisuuꞌ tee Ovoring tampuko noruꞌeriaing tee naning Tanuaang Meekung-eta karomaung, aiꞌ naninge tamung teeꞌ minkuvuarupeuꞌ. 4 Teing mmauꞌ Tanuaang Meekung-etaning avuavuꞌ otorong, teka Tanuaang teing avurimaung tee narung masikung. 5 Teing nko-nkonanka tee amutemuriiꞌ otorong, teka narung masikung Ovoring Jiisuuꞌ Karistooꞌ. 6 Napoꞌ niiꞌning otorong amutemuriiꞌ iriꞌ Kumponing-etaning mintoomparimaing, teka Kumponing tee narung masikung teing kante-koo mintoomparamaung. 7 Tanuaang Meekung bakaning nantoong-koo ookara-koo kante avutevuꞌari taaꞌniꞌantavaramaung, pakueeaꞌnaang. 8 Niiꞌnung-koo Kumponinge kara matau-poꞌnung makosi-antavumaung Tanuaang Meekunge. Niiꞌnung-koo kara noruꞌpoꞌnung avumaung teie narunge Tanuaange. 9 Niiꞌnung-koo arikung kuneꞌuko masikaꞌanta deto basi avumaung teie narunge Tanuaange. Niiꞌnung-koo Tanuaang-etaing avuavuꞌ siipa-poꞌnupoong taare-anta-koonung avumaung teie narunge Tanuaange. 10 Niiꞌnung-koo nko-nko deto basi nko-koong avumaung. Niiꞌnung-koo tarampee-koong avumaung. Niiꞌnung-koo iriꞌnanka Kumponing-etaning eeꞌnoko oreng simpeꞌkoong noruꞌ avumaung. Niiꞌnung-koo Kumponinge kara tasiꞌpaaꞌ meneng-koo sipumaung minkuvuuꞌnaang. Niiꞌnung-koo napoꞌ oovunara tasiꞌpaaꞌ menenge kara bereꞌkoong noruꞌ avumaung. 11 Aing teing ookara narung Tanuaang bakaning nko-nkonanka. Teie eeꞌnarai tankaampumaung narunaꞌ narunaꞌ kante piavomanaꞌ.

Dootuuꞌnupoong Teing Avutevuꞌariri Narung Mono-pinaꞌ Beꞌnuꞌniiꞌnuka

12 Tee eeꞌpinaꞌ: Naninung mono tee avatevaro-poꞌnung, nka teing avatevaronanka tee narung mono. Karistooꞌ bakaang mono teeꞌ oroꞌke. 13 Bane niiꞌ Juꞌnupoong niiꞌnooꞌ Juꞌdeeaing, daiꞌnisinuka niiꞌnooꞌ daiꞌariaing, nka tee narung Tanuaang-koo kuunge meekaꞌantamariruꞌnung-koo tee niiꞌ narung mono deemariri otong eeꞌnoko tee ookara narung Tanuaang okomuring makosinaꞌ iriꞌ nka-koo. 14 Naning-koong mono nariꞌ oroꞌ deeaꞌ, nka tee avatevaro. 15 Kauꞌke deekoꞌ aaꞌpui dei, “Ning aaꞌ bireng deeaꞌ, teeꞌkoo ning mono-koo-navioꞌ deeaꞌ,” teie temuriiꞌ karai tee mono-ita bitaꞌaravarupeuꞌ. 16 Eeꞌnoko domeꞌke deekoꞌ aaꞌpui dei, “Ning aaꞌ duta deeaꞌ, teeꞌkoo ning mono-koonavioꞌ deeaꞌ,” teie temuriiꞌ karai ee temono-ita bitaꞌarapeuꞌ? Otoaꞌ. 17 Ootukunung mono duta narung deempari dei, taara-nko areꞌ otong? Napoꞌ ootukunung mono domeꞌ narung deempari dei nuuraaꞌnko arerai? 18 Nka tee masikaꞌpari otoinaꞌ eeꞌ: Kumponinge avitevioꞌ beꞌnuꞌuring kantenaꞌ narung mono-koo teeꞌ nariꞌ niiꞌ narung mono-pinaꞌ otoꞌkoo bamuruꞌnaꞌ. 19 Ookara mono-koo namaranooꞌ naroꞌ otoi dei, arekeeꞌ mono tampampipeuꞌ? 20 Nka tee masikaꞌpari otoinaꞌ eeꞌ: Avatevaro otong teka narung mono tee. 21 Dutai aaꞌpuarupeuꞌ bireng, “Ning daꞌ piamoaꞌ.” Napoꞌ boreꞌke kauꞌ teeꞌpuarupeuꞌ. Katuaꞌ. 22 Niiꞌnairu mono-koo aruaruꞌnairu tampampimanairu tee tenairu-koo makosinaꞌ nkovupeuꞌ. 23 Eeꞌ, niiꞌ dotumarimaung otoko niiꞌnairu mono-koo orakaꞌ oonairu, eeꞌnoko tee tampaꞌ masikaꞌ nepuꞌmariri duaanamarimaung oo-koo makosinairu deeaꞌnairu. 24 Teka tee tampaꞌ oonairu baruꞌ tanatavampiaung. Teeꞌ nariꞌ Kumponinge mono beꞌnuveꞌnuꞌuuꞌ nepuꞌaravaꞌnairu nepuꞌui. 25 Teeꞌkoo tankatankaang otoarooꞌnaang mono-koo, teka navaronaꞌ mono tampaꞌ tanataveeai nariꞌ. 26 Niiꞌnavaro mono-koo sisikeeravoko tee ootukunairu nariꞌ toraꞌpaavaing. Navaroi daangang nkavuko deekoꞌ ootukunairu nariꞌ dotuariaing.

27 Enang tee diiꞌ Karistooꞌkoong mono, narunaꞌ narunaꞌ avatevaro otoring. 28 Eeꞌnoko Kumponinge bakaning dootuuꞌnupoong-koo aing eeꞌning miruꞌuruꞌ: tutuntoma teing kara okovuri nkanuka, kemuꞌkanaꞌ teing nakaroarimaing~, beemuꞌpinaꞌ teing kapooꞌ Kumponing-etaning naunuka, teketa teing iriꞌ ninka nko-nko nkoaamaing, teketa teing Tanuaang Meekung bakaang avuavuꞌpoꞌnupoong siipa-poꞌnupoong taare-anta-koong, teing nko-nko pakupaku-poꞌnung nkoaamaing, teing nko-nko tampaꞌ tankaampaamaing nantoong-koo, eeꞌnoko teing kara tasiꞌpaaꞌ oovunara menenge kareaamaing. 29 Arekeeꞌ, ookarai kara okovuri nkanuka naing ee? Aiꞌ ookara ee nakaronukai? Napoꞌ ee ookara kara-naunukai? Aiꞌ ookarai ee iriꞌ ninka nko-nko nkoaamaing? 30 Ookara ee tee avuavuꞌ taare-anta-koong otoꞌevorong? Ookara ee oovunara menenge kareaamaung? Ookarai ee kara bereꞌaamaung? Otoaꞌ. 31 Teka paaraveriaing tee Tanuaang Meekung bakaning avuavuꞌnanka pankeng masikeng nka-koo. Eeꞌnoko ampaꞌdoriaukaꞌ piaanavung navunge avuavuꞌnanka kong-koo makosi.